Göteborg (23.03.2012) |
3027
U drbii git's hie so schöni Sache
z.B. d'Sunnenungergäng
i ha mi das no nie trout z'säge
aber i luege die fasch gäng
u i finge's immer wieder super
i bi da nid so kompliziert
die schöni Schtimmig u die schöne Farbe
vom Chef persönlech komponiert
das muesch im Fau de zersch no chönne
für dass das jedesmau verhäbt
u was würd ächt dä ersch härebringe
wenn'r es aaschtändigs Budget hätt
i ma mr's gar nid überlege
dr Schuttplatz brönnt ömu scho wieder
u schnappt sech jitz grad ds Brünneguet
mir schtöh gloub gschider chli i d'Loube sider
gschider chli i d'Loube sider
gschider chli i d'Loube sider
u drbii git's hie so schöni Sache
z.B. d'Vögu vor em Huus
d'Amsle fö im Frühlig afa singe
u im Juni höre sie wieder uf
back to top
Schmocker oder Schmid
Momou das isch ne
Ruedi Schmocker oder Schmid
Parallelklass bis zur dritte Sek
wieso grüesst jitz dä mi nid
die si doch denn uf Niederscherli züglet
u är isch aube DJ im Gasschessu gsii
dä het mi jitz genau gseh vori
wieso louft jitz dä eifach vrbii
dä isch doch denn no gah schtudiere
z'Ängland oder z'Kanada
u när isch'r bi sim Père iigschitege
u när het'r ja dä Unfau gha
genau denn nach em Cupfinau
das si 10 Jahr oder no meh
es het kene überläbt
i beidne Chärre
für das het'r aber guet usgseh
dr Ruedi Schmocker oder Schmid
wieso grüesst jiitz dä mid nid
back to top
Hallo Schiisluun
Es liegt nid am Wätter
dr Himu isch blau
d'Sunne schiint u es luftet chli
d'Lüt hocke im garte überau
u mi Nachbar lachet übere Zuun
u är winkt mr u lüpft si Huet
es isch Summer am Sunnitg Namittag
u es isch gar nid guet
wieder dobe ir Wohnig
i weiss nid rächt was
idräije e Rundi de Fänschter nah
i luege use u abe uf d'Schtrass
u jiitz gsehn i ne vo witem
wien'r um d'Egge schliicht
ds Töri geit uf u när geit ds Lüti
weisch was das isch mir doch gliich
he hallo Schiisluun
wo bisch de due jitz gsii
i ha gmeint du heigsch mi vergässe
i ha scho ds Gfüeu gha das sig's jitz gsii
chunnsch jitz wieder cho schtürme
säg was bisch du für eine
chumm ine du kennsch es ja
füeu di wwie daheime
es liegt nid am Wätter
dr Summer isch düre
jitz chunnt's de wieder cho schiffe
u när wott's de wieder nid höre
aber de söu's doch cho schiffe oder cho schütte
mir isch das ehrlech gseit einerlei
mis Huus isch zwar e zügigi Hütte
aber immerhin bin i nid allei
he hallo Schiisluun
wo bisch de du jitz gsii
i ha gmeint du heigsch mi vergässe
i ha scho Fröid gha das sig's jitz gsii
hesch du süsch keni Kollege
säg was bisch du für eine
chumm ine du kennsch's ja scho
füeu die wie daheime
back to top
Göteborg
I rusche grad i mim Charre am Grauhouz vrbii
Richtig Züri Flughafe uf dr Outobahn
mi Schatz u mini Chliini chöme hei vo Göteborg
u i muess jitz die gah abhole u i bi vieu z'schpät dran
u plötzlech ghören i es Schlagzüg u ne Basslouf i mim Chopf
es paar Akkörd u ne Melodie - nume es Fragmänt
aber es tönt verdächtig wie ne nöiie Song wo grad wott cho aachlopfe
zmitts uf dr Überhouschpur - e sehr guete Momänt
u jitz faat's ihm afa dichte u jitz hört'r nümm meh uf
Schtrofe Refrain ziemli guet aber wie söu das gah im Charre
i cha mr das jitz nid ufschribe u bis i dert bi han i das vergässe
wie söu i das jitz mache hie gsehsch nid i muess fahre
gang doch zum Huber
dä isch viellech froh für ne Idee
oder gang zum Hofer
däm isch es längwilig am Thunersee
oder gang doch zum Heiniger
dä bruucht viellech mau e Hit
eifach zu mir muesch jitz nid cho
nei nei nei i ha ke Ziit
gang doch zum Flückiger
dä würd die äuä o no näh
oder gang bim Halter vrbii
dä het mir o mau eine gä
oder gang zum Schmidhauser gah schtürme
dä wohnt gloub o nid wit
eifach zu mir muesch jitz nid cho
i ha ke Ziit
i ha ke Ziit für di
i ruusche grad i mim Charre am Grauhouz vrbii
Richtig Züri Flughafe uf dr Outobahn
mi Schatz u mini Chliini chöme hei vo Göteborg
u i muess jitz die gah abhole u i bi vieu z'schpät dran
back to top
Gitarre-Johnny
Schpieu dini Gitarre
schpieu se no einisch
Johhny
es het no paar Songs
u los emau die Lüt
die wei no nid hei
dass die nümm meh zrügg chunnt
das hätt i dr chönne säge
vergiss die Johnny
schpieu no chlei
Gitarre-Johnny
schpieu no chlei
was wosch de jitz mache
dere wieder hingernache loufe
so wie immer
das isch's doch nid dr wärt Johnny
die wartet doch nume druuf
die weiss scho wie
gang jitz uf d'Bühni Johnny
u hör jitz uf mit dim Gwimmer
u schpieu dini Gitarre
schrib doch es Musical über die
Gitarre-Johnny
back to top
När bring I wieder öpper um
Bou du nume a dim Troumschloss
u bhüet dini Frou u dini Ching
u blagier no chli mit dim Bekanntekreis
u dräii Rundine mit dine Hüng
u schaff fliissig a dim Handycap
u log di schpät am Aabe aube no chli ii
u sug dr dini klassischi Musig abe
u lueg es paar Püppi a zwüsche drii
u chumm verzeu no chli vo früecher
vo dine junge wiude Jahr
u hou die Gitarre vüre u zupf's no schnäu
dis Mani Matter-Repertoire
u faus i usgseh wien e Fründ vo dir
pass eifach uf u dräii di nid um
mir längt e haubi Chance
när bring i wieder öpper um
när bring i wieder öpper um
u gäu es wär aues no vieu besser
we aui zfriede wäre überau
u we niemer Hunger hätt u we niemer müesst schtärbe
oder höchschtens vor Längwili im schlimmschte Fau
back to top
Mängisch rütscht's eim us de Händ
Es het nid nume schlächti Site
so nes Läbe aus Vampir
moralisch chan i's nid erkläre
u dir gseht das sowieso nid so wie mir
aber aus i auem gieben i mir Müeh
i bi gloub ke schlächte Cheib
guet es git Sache won i nid grad schtouz bi druuf
u zwo drei Gschichte tüe mr hütt no leid
aber eigentlech git's gnue vo dene Schpinner
wo wei mitmache im Verein
da bruuchsch hütt niemer meh gah z'überschnure
die wo das wei die finge eim
u mit dene machsch när eifach öppis ab
u när triffsch di irgendwo
u erklärsch ne auses ds Längem u ds Breitem
wie das geit u weli Optione dass sie hei u so
u we sie när nid warm wei wärde
oder nid ganz sicher si öb sie das würklech wei
so wie die chliini Sekretärin geschter
de mues i das när o nid ha
de gahn i wieder hei
guet i wär fasch ggange muess i säge
i ha's gloub vori scho erwähnt
es git Sache won i nid grad schtouz bi druf
aber mängisch rütscht's eim eifach us de Händ
mängisch rütscht's eim eifach us de Händ
back to top
Bugguwau
E Bugguwau rammt es Rettingsboot
zwe Persone si verletzt
ds Schiff kaputt dr Schade gross
nünzgtuusig Dollar hei sie gschätzt
churz vor Brisbane sig's cho schtürme
ds Wasser sig schwarz worde u dr Himu grau
u sie im höche Boge über ne Wäue
u lande usgrächnet uf däm Wau
dä isch grad uftoucht für chli Luft cho z'schnappe
u het das Schiff gar nid gseh cho
öb's ihm öppis gmacht het hei sie nid gschriebe
aber e Büle im Buggu het'r äuä scho
back to top
Chliini Gibson
I ha mr nöilech e Gitarre bschteut
en akustischi Gibson us de Vierzgerjahr
irgend e Link uf dr Site vom ne Lade in Manhattan
Matt Umanov Guitars
u jitz schteit sie bi mir daheime
i mim Wohnzimmer in Bärn-Bethlehem
im ne Gitarreschtänder näb em Fernsehtischli
wunderschön
mini Bändkollege die chöme mi cho bsueche
u die gloube's chuum we sie se gseh
so ne hübschi Gitarre chasch jitz lang gah sueche
die fingsch niene meh
u logisch wei när aui mit ere schpiele
u usprobiere wie sie tuet
aber de mues i aube säge stop jitz Giele
häbet öii dräckige Finger furt
i bi im Fau nid iiversüchtig das isch nid ds Problem
es git eis chliises Detail u das bruuche die nid z'wüsse
die chliini Gibson isch zwar tüür gsii u sie isch wunderschön
eifach töne tuet sie ehrlech gseit beschisse
i ha mr nöilech e Gitarre bschteut
en akustischi Gibson us de Vierzgerjahr
irgend e Link uf dr Site vom ne Musiglade in Manhattan
Matt Umanov Guitars
u jitz schteit sie bi mir daheime
i mim Wohnzimmer in Bärn-Bethlehe
im ne Gitarreschtänder näb em Fernsehtischli
wunderschön
back to top
Pinsuschwinger
Sie ma's jitz eifach nümm meh gseh
immer ds gliiche Züüg
technisch tip top da chasch nüt säge
aber en Idee drhinger
füdlenüt
jitz chunnt'r mit sim nöischte Wurf
d'Farbe si no füecht
u fragt se schtouz was se so dünki
u när faat'r aus afa erkläre
u mit jedem Wort wird's immer schlimmer
sie cha ne eifach nümm meh ha
dä Schiispinsuschwinger
back to top
50 Wörter
Zmitts im Waud ganz allei
e chliine Maa uf churze Bei
isch am pressiere u am renne
är wott i d'Schtadt abe gah Lüt leere kenne
dummerwiis pressiert är vergäbe
är het nume füffzg Wörter Ziit zum Läbe
u einevierzgi si gsunge
u är isch ersch afe z'Luterbrunne
back to top
Rain Dogs Learning To Crawl
Sie het im ne Plattelade gschaffet
ir obere Autschtadt im ne Ungergschoss
u mir si aube umeghanget dert u hei se aaggaffet
u hei üsi Namittäg verplämperet u Musig glost
unger dene Chopfhörer mit heisse Ohre
Rain dogs Learning To Crawl etc.
u sie het Zigarette groukt a ihrem Tischli vore
oder Schibene sortiert u i d' Regau z'rügg ta
u när isch sie aube dür die Gäng schtouziert
verläge wärde chasch nid meh
mir hei das jedes mau persönlech gnoh
u drbii he sie nis äuä aube gar nid gseh
u irgendeinisch isch si furt gsii
verschwunde us üsem Läbe
u när hett süsch eine übernoh u när no einisch eine
u jitz git's nid mau meh dr Lade
sie het im ne Plattelade gschaffet
ir obere Autschtadt im ne Ungergschoss
u mir si schtändig umeghanget dert u hei se aaggaffet
u heii üsi Namittäg verplämperet u Musig glost
schtundelang bi jedem Wätter
nie Gäud u gäng e huuffe Ziit
dert han i mini liebschte Bänds gleert kenne
eifach sie när leider nid
back to top