Hauptseite Biographie Discographie Sounds Kritik

Sport und Musik
Sport und Musik (1987)
  1. dynamit (3.08)
  2. dass es immer no schneit (2.50)
  3. hansdampf (4.24)
  4. ragazze & ragazzi (2.42)
  5. 7 : 7 (2.57)
  6. chumm (2.35)
  7. entwickligsschtück (4.35)
  8. sörf (2.53)
  9. wenn'i nid drbii bi (2.52)
  10. z.w. (3.14)
  11. hans peter (2.20)
  12. nümm mit dir zäme sii (3.00)
  13. i dene jahr (3.30)
  14. är hett uf sim chopf... (2.45)


dynamit

einisch ir nacht won'i schpät no bi gloffe
d'bundesterrasse z'düruf gäge hei
han'i e bärtige typ atroffe
u gseh grad dass dä sech dert jemersnei
dass dä sech dert zu nachtschlafener zyt
am bundeshuus s'schaffe macht mit dynamit
'bi erchlüpft u ha zuen'ihm gseit säget
excüse - aber es gseht fasch so us
wi we dir da jitze würklech erwäget
das grad i d'luft wöue z'schpränge das huus
ja seit dä maa - mit füür es mues sii
furt mit däm ghütt - i bi für d'anarchie
was isch aus bürger mir da übrig blibe
aus ihm's probiere uszrede i ha
ihm afe d'vorteile aui beschribe
vo üsem schtaat eso guet win'is cha
ds rütli u d'freiheit u d'demokratie
han'i beschwore - är sou's doch la sii
d'angscht hett mis rednertalänt la entfaute
chüeue hett dr wind um üs gwäit i dr nacht
während ig ihm en'ouguschtred ha ghaute
dass es es ross patriotisch hätt gmacht
zletscht hei dä maa mini wort so berückt
dass är e träne im oug hett verdrückt
so han'i schliesslech dr schtaat chönne rette
u är isch mit sim dynamit wieder hei
un'i ha mir a däm aabe im bett
en'orde zuegschproche für mi ganz allei
glunge isch nume dass z'monderisch scho
über mi red mir du zwiifu si cho
han'ig ihm d'schwitz o mit rächt eso prise
frag'i mi no bis hütt hindedrii
u no uf eis hett dä maa mi hiegwise
louf'i am bundeshuus wider vrbii
mues i geng dänke s'schteit nume uf zyt
es länge für's schpränge paar säck dynamit

back to top

dass es immer no schneit

i dire losche isch es chaut
d'mieti isch nid zaut
es rägnet oder schneit
es isch 10ni du ligsch geng no im bett
u hesch chopfweh u bisch müed
ds telefon geit
s'isch dr schef wo seit
jitz bruuchisch gar nümm z'cho
u das gieng ja no
aber du bisch truurig win'es saxofon
u sie isch nümm da
jitz housch ihre brief no einisch us em abfau
u setzisch 'ne zäme u lisisch no mau
was de fautsch hesch gmacht
u a was dass es ligt
u sie bringi dr de hütt no dini platte zrügg
u du ligsch wieder ab u wirsch fasch verrückt
wüu ds chüssi no so fescht nach ihre schmöckt
s'chunnt dr aues i sinn
ds lied vor königin
u dass es immer no schneit
u dass dr winter no 3 mönet geit

back to top

hansdampf

bärn - irgendwenn im mai uf dr polizei lütet ds telefon
dr herr wüeterich vor wuet usser sich hett ke rueh meh uf em baukon
5 minute schpäter
eis gezeeter
d'frou schpanner hett öppis ghört
irgendwo ar aare - sie isch sech nid im klare was es isch - aber es schtört
3 jungi polizischte schtarte ihri chischte u fahre richtig marzili
es isch e schööne aabe - si sii müed am aabe
u kene vo ihne hett bock uf krimi - s'wird warm im wage
si löh d'schibe abe u jitz ghöre si's ufzmau
musig tönt u dr himu brönnt überem gaswärkareau
si fahre nöcher häre
chöi sech nid erkläre was dert unde genau passiert
2 schtige us - loufe cool zum huus - während dä am schtüür ds outo parkiert
chuum sii si dinne
chunnt dr eint scho z'schpringe
u hockt atemlos ufe näbesitz u hueschtet i ds funkgrät
jungs - mir sii e schtung z'schpät
d'dampfzentrale isch bsetzt
i däm song hie schneits scho wieder
aber dasmau schneits konfetti
u d'wäut schteit uf em chopf u dräit sech überem parkett
1000 bärner dräie mit u i schtah irgendwo ir miti
u cha nid gloube was i gseh
wüus das z'bärn gar nid git - aber hütt
'paar minute druuf fahrt verschtärchig uf - 2-3 schtreiffewäge
dr schweingrueber geit zur bar un'es paar anderi warte bir schtäge
ar bar fragt är wär isch dr schef vo däm verein
üse schef heisst hansdampf u dr hansdampf isch hie daheim
z'bärn diskutiert me gärn u grad über kultur u de chöme si drhär
politiker u d'vereine u mängisch gseht me sogar dr kultursekretär
aber wo sii die lüt wes einisch äkschn git - de sii si irgendwo daheim
we z'bärn irgendöpper kultur macht chunnt meischtens nume d'polizei

back to top

ragazze & ragazzi

samschitg aabe
turischte i dr schtadt
früsch polierti schtrasse
d'giele uf dr jagd
hei sech useputzt u hetze wie wiud jedem arsch nache
wärfe sech jedere i ds biud
gsehsch päärli promeniere
gsehsch die meitschi am egge
wo im usseschpiegu ihre lid-schtrich tschegge
gsehsch wi'si warte
gsehsch wi schön si sii
u si warte scho lang
aber si warte nid uf di
voglio und donna
chlätter-szene
machsch eine uf risiko
d'hose verrisse aber gratis inecho
irgend sone fuer
eini vo der parties
mit chüele froue u bunte smarties
hänksch di a d'bar
e 10ner für'nes flute
aber glii wird dr klar
für'ne 10ner louft nüt
d'ladies sii am tanze
d'ladies hei durscht
was si trinke isch dr klar
wär's zaut isch'ne wurscht
voglio una donna
froue wo'de chunnsch dr
vor wie uf em boum
hesch e pouse i de hose
tröimsch di einsam troum
gsehsch päärli promeniere
gsehsch die meitschi am egge
wo im usseschpiegu ihre lid-schtrich tschegge
gsehsch wi'si warte
gsehsch wi schön si sii
u si warte scho lang
aber si warte nid uf di
i wott e frou

back to top

7 : 7

es isch schpät am ne donnschtig aabe im februar
mir schpile carambole
sie hett wiisses pulver i de haar
wiisses pulver am puli u die wiisse schteine
u jitz nume no eine u dr rot u sie seit
was gisch mr wenn'i gwinne
mir chunnt nüt i sinn
i bi verläge u froh dass zersch dr wiiss abegehit
dr rot u mini 2 macht 7 : 0 für mi
un'i weiss genau sie ett's äxtra gmacht
u sie leit d'schteine uf ds brätt
u faht no einisch a u seit
du muesch wüsse i ha päch im schpiu
u när laht sie mi abe nach schtrich u fade
u am schluss han'i genau 2 schteine z'viu
7 : 7
sie seit sie sött eigentlech ga
no ds letschte schpiu
i schteue uf u schpile a
i triffe drnäbe u luege se a
u frage se
blibsch hütt da wenn'i gwinne
sie lachet u seit
hesch dr's guet überleit
wüu du chasch sicher sii
de zielen'i nümme
7 : 7
unentschide isch's nid
es isch 7 : 7 für mi

back to top

chumm

es isch schlimm
es isch schlimm sit i nümm vo dir ha ghört
i füele mi drnäbe u benime mi wi gschtört
i sueche di ir schtadt
un'i trinke jedi nacht
un'i weiss nümm witer
un'i füele mi so schwach
chumm
i ha sit tage nümme gässe u schlafe chan'i nid
i wäuze mi im bett u dänke nume no a di
u de hauten'i's nid us
u de lüten'i dr a
u las 100 mau lüte aber du bisch nid da
chumm
bitte chumm doch wieder zrügg un i frage nid warum
i frage nid mit wäm un'i bringe'ne nid um
aber i mues di wieder gseh un'i bruuche di so sehr
u du ghörsch doch zu mir
un'i ghöre doch zu dir
chumm

back to top

entwickligsschtück

me gseht se nümm so viu ir schtadt
öppen am sunntig mau im tierpark
är schtosst dr wage - sie fuetteret d'büffle
u di chliini grännet u schiesst dr nuggi furt
är bückt sech u är gseht chli komisch us
villecht isch's dr teddybär i sim hosesack
är list dr nuggi uf u tuet ne dr chliine wieder ine
u die grännet u grännet u hört nümme uf
u jitze wird är ganz nävös
u laat dr chinderwage schtah
sie het erwarme - nimmt die chliini i d'arme
u die wird plötzlich schtiu u lachet ds mami a
sis schnäue outo het är immer no
u so schön wie's isch - es ligt jitz nümme dinn
u mit däm chindersitz isch's nume no haub so schpitz
sie findet's sowieso e witz u wet lieber non es ching
dür d'wuche schteit är hinderem gmüesregau
är schafft im lade wo sim schwager ghört
u dä kennt'r no vor schueu u het ne nid nöge schmöcke
het ne nidemau beachtet u jitze isch es umgekehrt
aber är verchouft das gmües mit charme
är het geng e schpruch parat
är lachet mit de dame - kennt jedi bim name
da chunnt dr schwager us em lager
u si charme gheit i chopfsalat
es isch truurig - es isch wahr u me würd ne fasch nümm kenne
dr rebeu hingerem gschteu - hanspeter jitz bisch ne nümme

back to top

sörf

i ha 100 mau im windkanau träniert
ha jedi fachzytschrift schtudiert
u jedes füfi inveschtiert
u i bi zäme mit mim sörfbrätt
mit em flugzüg nach amerika
u jitzt zeigen'i dene beach-bubis was'i i de wä-ue druffe ha
u die gloubes nid u luegen'e chli dumm
chumm schtan'i uf em brätt
dräit sech jede nach mir um
wenn'i haubhöch i dr hocki wi'ne junge gott über d'wäue flüge
u i dr gröschte brandig gäng no waagraächt i de kurve lige
wenn'i elegant uf eire hand i're wasserwand verschwinde
u mit dr andre hand ganz locker mini sörfbermudas binde
u das hei d'amis i de chöpf nid rächt vertreit
u d'froue sii verschärft ab mine kunschtück düregheit
u si verzeue sech dass i dr heissischt sörfer i dr bucht bi
un'i chume nümm zum sörfe wüu i schtängidg uf dr flucht bi
un'i wirde langsam hässig
un'i wirde langsam bös
wüu i ha disziplin wie dr primin un'i nimes seriös
schtang - schtang - schtang ab mim sörfbrätt
ganga - gang - gang vo mim brätt wäg

back to top

wenn'i nid drbii bi

i weiss i bi schön un'i ha talänt u das überem durchschnitt
aues ligt zu mine füess u i mine händ
u chuum e schritt wit ligt ds glück am bode
u winslet wüu äs weiss dass es nume mi git
es wartet uf mi
ds glück wartet uf mi
i chume wenn'i bock ha u villech man'i o grad nid
i weiss i has mit froue im augemeine ringer
i chume vo dr bühni u schnippe nume mit em finger
u chli schpäter schtöh si reihewiis vor üsem hotelzimmer
u warten'ufmi
si warten'uf mi
i chume nume wenn'i bock ha
u villech man'i o grad nid
säg emau - bisch nidisch uf mi
i gloube fasch du liidisch e chlii
i wo vo jedem chueche ds gröschte sctück für mi abschnide
i wo's nume mit dr auerbeschte bibe tribe
i wo i dr szene dr tarif düregibe
u du trifsch dini dicki fründin u sie seit es ligi nümm dinn
u villech biud'i mir das ii aber ifrüchte o sie schteit uf mi
säg emau bisch niidisch uf mi
i gloube fasch du liidisch e chlii
u du weisch so viu
du weisch no meh aus i z'verzeue über mi
wenn'i nid drbii bi

back to top

z. w.

mir frässen'üs es loch dür zyt mit üsem tag für tag
es loch wo immer töiffer wird
es ewiegs uf und ab
tröime vo däm blaue schloss
troum vom grosse gäud
bis de ds gfüeu für d'zyt verliersch
tröim regiere d'wäut
modeschou uf em bäreplatz
d'meitschi wärde zeigt
me isch nid viu u schiint drfür
jede schpiut dr heud
es isch mr eifach z'heiss ir schtadt
summer uf dr gass
öppis wo mi use zieht
i ha scho mänge zug verpasst
u wenn'i z'bärn am fänschter schtah u d'sunne grad im meer versinkt
u mis einsame härz schmärzt so fescht
de dänken'i a di
un'es zieht mi schwär zu dir nach züri
ir nacht i lige wach im bett
irgend es gwüsse wo mi plagt
so mängs i mir wo ungwüss isch u so mängi offeni frag
am morge uf em wäg zum job im tram mit frömde lüt
d'sunne wo uf d'zytig schiint aber vor wärmi schpüren'i nüt
u fasch jede aabe
bau jede aabe rock'n'roll
es isch gwüss nid gäng es fescht
fasch jede aabe
bau jede aabe viu z'viu schtimorol
dass d'nümme weisch öb d'scho so aut bisch wie das gsicht wo d'vor dir im schpiegu hesch
es chunnt mr eifach komisch vor
das ganze drumm u dra
mängisch liess'i schampar gärn aues la schtah u fieng vo vorne a
u wenn'i z'bärn am fänschter schtah u d'sunne grad im meer versinkt
u mis einsame härz schmärzt so fescht
de dänken'i a üsi zyt u de tröimen'i vo dir
isch es bärn - isch es basu - isch es ....... züri west

back to top

hans peter

umehange - umeschtah - wär seit wohäregah -
wär seit wo's üregeit - was isch wo agseit -
wäre fahrt mit welem mit - är het e heisse
schlitte - är isch ne sowieso - hanspeter - i
wott mitcho....
är findets heiss we me si name uf franzäsisch
seit - är isch es gräui erschiinig öb'r hocket oder
schteit - 2 meter ohni rouschueh - dermasse
bi figur - e maa wienes ärdbebe - steu dr mau
vor du loufsch mit dim meitschi dür d'schpitugass
u ihri aute si am see u sie verzeut grad
dass daheim e fläsche rosé im chüeuschrank
schteit u re ds puff i dere schtadt uf e wecker
geit u jitz nimmsch none biss vo dim whoppercheese
u überleisch dr scho mau - rein präventiv - was di
dene i dr bude seisch we d'morn am morge ufschtisch
u weisch dass d'di jitz lieber no zu
ihre leisch - jitz wosch ere grad säge wo dis
velo schtei u merksch wie dr dr whopper uf d'sandale
gheit - ghörsch reiffe quiitsche - gsehsch zwedrei meter
chrom u bläch u drinn dr hanspeter u du gsehsch wie
sie iischtigt - wie sie näbenang hocke - är isch dr king -
du hesch dr burger i de socke - hanspeter - früecher
oder schpäter chunnt dr hanspeter - hanspeter
i warne di - hanspeter i hasse di - hanspeter u nid
nume i - hanspeter gang furt vo hie

back to top

nümm mit dir zäme sii

i ha dr telefoniert
ha vorhär lang schtudiert
öb i söu oder nid
u ha glich probiert
du hesch abghoh u i has scho wieder beröit
u irgend e dummi story verzeut
was wosch hesch gfragt
i weis es nid han'i gseit
un'i lüte wieder a
u ha wieder ufgleit
u jitz bisch furt u mi schiissts a
dass i nüt ha gseit wüu i weis
i cha nümm mit dir zäme sii
un'i trinke non'es glas
villech hiuft das
u när no grad eis
u weis glich nid was säge
welli wort - weli reihefoug
u wenn am beschte u warum überhoupt
i weis nume dass i's vorhär nid ha usebracht
weis nume dass'i di hütt gseh zum znacht
u de hocksch vis-a-vis u de luegsch mi a
u de nimmsch mini hand un'i wiess
i cha nümm mit dir zäme sii
denn chan'is nid säge
das lig tnid drinn
das schaffen'i nid
i blibe daheim
i gloube i ha fieber
i gloube mir isch schlächt
genau - i bi chrank - das isch mis guete rächt
i nime ds telefon u wähle ds nummero
das mues sie ja begriffe u da isch sie scho
hallo - i bis no mau - bisch no im gschäft - gottseidank
los - i cha hütt nid wüu i bi ...
.... i cha nümm mit dir zäme sii

back to top

i dene jahr

ir nacht hett's gschneit
aui farbe sii verschwunde
e iis-chaute morge
si renault schteit dunde ar schtrass
är mues jitz los
nimmt dr mantu u geit
u sie wartet no bis dr motor dunde seit dass är furtfahrt
sie luegt zum fänschter us u gschpürt wi chaut dass es isch
u isch froh dass är wenigschtens z'nacht bi're isch
u am wuche-änd
we sie a früecher dänkt chöme're type i sinn
u sie mues lache u isch froh git's jitz nume no ihn
u süsch nümm für sie
sie schüttet kafi nache u blibt no chli hocke
schteckt e zigi a bevor sie dr chlii mues wecke wo no chlaft
sit är i chindergarte geit isch si dr tag dür allei
das hätt sie früecher nid gschafft
aber allei sii isch schön hett sie glehrt i dene jahr
u das isch gar nid wahr
isch aues gar nid wahr
u jitz isch d'szene wieder klar
u ds gäud ligt uf em tisch vom typ mit em renault wo grad gange isch
dr gafi isch chaut u ds liecht isch kaputt
sie hett chaut u isch blutt u allei
alleit sii hett sie glehrt i dene jahr

back to top

är hett uf sim chopf...

är hett uf sim chopf e chopf gha
u uf däm chopf wieder e chopf
uf däm chopf hett's e huet gha
u uf däm huet wieder e huet
dert aber ganz z'oberscht obe
ar schteu vom ne dritte huet
dert hett es vögeli gsunge
so öppis chunnt säute guet
das vögeli isch ihm entfloge
hett gseit für ne schtung oder so
das fögeli aber hett gloge
isch niemeh umecho
jitz schteuet'nech vor dä aablick
3 chöpf u nume 2 hüet
kes wunder dass är isch gschtorbe
wortzigi - läbesmüed

back to top