Hauptseite Biographie Discographie Sounds Kritik

Radio zum Glück
Radio zum Glück (25.8.2001)
  1. pamplona (3.44)
  2. ohni di (3.57)
  3. julia (3.13)
  4. no'ne blues (3.07)
  5. obsi nidsi (3.27)
  6. monster (3.32)
  7. hermann (3.29)
  8. toti flüger (3.43)
  9. geburtstag (3.06)
  10. wenn i di nid cha überrede (3.04)
  11. radio zum glück (2.32)
  12. miuch & zucker (3.40)
  13. hugetobler (2.54)


pamplona

är isch tatsächlech sehr e geile Siech
aber är isch ganz e schlimme Finger
scho wo‘n‘ech ds erschte Mau ha zäme gseh
du bisch mit ihm zu dere Tür iicho
het‘s mi dünkt es wärdi grad chli gar schwüeu im Zimmer
i cha verschtah - du - dass d‘s hesch müesse ha
so eine triffsch nid jede Tag im Läbe
u sini schwarze Haar u sini edli Hut hätte - säg mr nüt
sicher huere guet zu dire Bettwösch passt - momou
i weiss genau was d‘mr wosch säge
lue mir chöi guet no chli z‘Bilbao blibe
d‘Feria in Pamplona geit am 6. Juli los
i cha o eifach afe gah we d‘wosch allei sii mit dim Chummer
aber ei einzige Torero macht no lang ke Summer
mir chöi z‘Burguete gah Foräue fah
i würd säge zwodrei Schtung
nei es isch nid so wit
we mir bi ziite göh morn Morge
i müesst is irgendwo zwo Ruete bsorge
lue dr Banderillero a dr Bar luegt scho die ganz‘ Zit
du seisch mir chönnte zäme eso glücklech sii
säg wei mr is nid no so zwe Martinis bschteue
mir chöi o süsch no nöime häre
lueg mi nid so a - du muesch mr nüt erkläre
es isch zum düreträiie schön wenn i mr‘s mängisch vorschteue
lue mir chöi guet no chli z‘Bilbao blibe
d‘Feria in Pamplona geit am 6. Juli los
i cha o eifach afe gah we d‘wosch allei sii mit dim Chummer
aber ei einzige Torero macht no lang ke Summer

back to top

ohni di

i chume nid ganz drus
du schpannsch mr mini Frou us u jitz grännisch hie vor mire Tür
sie sig dr am verleide
wosch mr jitz e Garantieschiin zeige oder was chunnsch usgrächnet zu mir
gäu du hesch gmeint es wärdi easy
nume luege öb sie aabiissi
chli am Gras schmöcke änet em Hag
u jitz laat sie di nümm la schnuufe
sie hautet nid sehr viu vo iigroove
we sie einisch ja het gseit de wott sie‘s jede Tag
sie laat di nid la sii
telefoniert dr pouselos u we d‘nid abnimmsch schteit sie vor dr Tür

u we d‘nid da bisch suecht sie überau
ir Beiz - im Büro - uf dr Bouschteu
u we d‘se fragsch wieso
seit sie sie hauti‘s eifach nümmeh us ohni di - ohni di

gäng denn we d‘wosch allei sii wett sie gärn mit dir schmuse
u we du dini Zitig liesisch redt sie pouselos
u we d‘es ungradsmau nid masch daheim sii wott sie gäng o grad use
sie chunnt mit i Üebigsruum u sie chunnt mit i ds Stadion
u we sie mau nid bi dr isch telefoniert sie Tag u Nacht
u we d‘nid abnimmsch schteit sie vor dr Tür

u we d‘nid da bisch suecht sie überau
ir Beiz - im Büro - uf dr Bouschteu
u we d‘se fragsch wieso
seit sie sie hauti‘s eifach nümmeh us ohni di - ohni di

gäu jitz bisch fix u fertig
i weiss du wosch se nümm meh
un‘i weiss du weisch nume nid wie
mach‘s eifach so wien‘i‘s ha gmacht
mach aues für sie wo sie für di macht
u bis lieb u zärtlech u geduldig u häb Charme
telefonier - schick‘ere Faxe
u red über dini Gfüeu u frag se
öb sie nume haub so glücklech sig wie du bisch
nimm se i Arm
gib‘ere ds Gfüeu du wöusch se meh aus sie di je chönnt wöue
säg du wöuisch se für immer u du heigsch dr‘s überleit
u hürat se im nächschte Früehlig
un‘i dänke dass sie auerschpätischtens im übernächschte geit

back to top

julia

i ha d‘Cottlett gschnitte un‘e schnäue Schlitte un‘e breite Fernseh gleaset
i han‘e schiggi Loge i dr Matte gmietet wäge ihre
i gah gah Gwicht schtemme - i bi am Choscht trenne
i schwümme u renne u schlote fasch nümme
es isch schier ungloublech was i aues tribe wäge ihre

oh Julia - du luegsch mi nid emau meh a
i schla Räder wie‘ne Pfau u du bemerksch mi nid emau meh - Julia

i überschütte se mit Gschänkli un‘i schänke‘re d‘Getränk i
i verränke mi un‘i dräiie für sie die geilschte Pirouette
i gah‘re jede Tag gah iichoufe - i la‘re ds Badwasser la iiloufe
un‘i wösche für sie un‘i lege‘re d‘Wösch zäme u glette

oh Julia - du luegsch mi nid emau meh a
i schla Räder wie‘ne Pfau u du bemerksch mi nid emau meh - Julia

i schribe‘re Gedichtli u zeichne überau ihres Gsicht hi
un‘i säge‘re immer wieder wie gärn dass i mit‘ere zäme bi
i singe‘re schöni frömdi Lieder
u sie het jitz schiinbar irgend so‘ne schöne Frömde lieber aus mi

back to top

no'ne blues

die meischti Ziit bin‘i ganz guet ungerwägs
i chume vür u für mini Verhäutnis meischtens nid schlächt z‘schlag
meischtens tscheggen‘i ziemli zügig wo‘s düregeit
u für die schwierigere Fäu han‘i meischtens schnäu en Usred parat

meischtens dünkt‘s mi guet eso wie‘s isch
u meischtens fing‘i es liegi dinn
u meischtens isch‘s mr gliich wo d‘ bisch
u meischtens bisch mr nid im Sinn

meischtens schtahn‘i mit beidne Schtifu uf em Teer
mir fääut meischtens nüt zum überläbe
meischtens vermissen‘i di nid emau meh sehr
u ds Meischte wo kaputt isch gange han‘i chönne chläbe

meischtens dünkt‘s mi guet eso wie‘s isch
u meischtens fing‘i es liegi dinn
u meischtens isch‘s mr gliich wo d‘ bisch
u meischtens bisch mr nid im Sinn

mängisch dünkt‘s mi ewig un‘es Jahr här oder meh
u mängisch fragen‘i mi öb i gross i ds dribble chiem wenn i di würd gseh
viellech würd i di gar nid bemerke i de Lüt
mängisch würd i di am liebschte sueche - aber meischtens mach i‘s nid

meischtens dünkt‘s mi guet eso wie‘s isch
u meischtens fing‘ i es liegi dinn
u meischtens isch‘s mr gliich wo d‘ bisch
u meischtens bisch mr nid im Sinn

back to top

obsi nidsi

obsi - nidsi
uh - du dräiisch mi
hingerfürschi u zringsetum
obsi - nidsi
uh - du dräiisch mi
hingerfürschi u zringsetum

sit i sie kenne chum‘i nümm zum penne
es louft jedi Nacht gäng gliich
chuum geit ds Liecht us isch‘s vrbii mit mire Rueh
i liege zfriede da
u chuum wird‘s fiischter faat sie wieder a
i bringe mini Ouge nümme zue

obsi - nidsi
uh - du dräiisch mi
hingerfürschi u zringsetum
obsi - nidsi
uh - du dräiisch mi
hingerfürschi u zringsetum

es fäut weder a mim Wiue
no bruuchen‘i irgend so‘ne Piue
nei - die ganzi Gschicht isch einiges bekloppter
i wäuze mi - dräiie mi um u häbe d‘Ohre zue
biisse uf d‘Zäng
mis Baby schnarchet wie‘ne Helikopter

obsi - nidsi
uh - du dräiisch mi
hingerfürschi u zringsetum
obsi - nidsi
uh - du dräiisch mi
hingerfürschi u zringsetum

mis Bett isch ihres Cockpit
hie schtartet sie d‘Maschine
u flügt jedi Nacht uf u drvo i‘ne Wäut won‘i nid kenne
sie flügt über siebe Bärge u über siebe Meer
u immer mit öppe hundertsiebe db dr Tapete na dür ds Zimmer

back to top

monster

es chliises fieses Monster hocket im ne chliine Chäfig
im ne chliine Chämmerli im Dachschtock obe i mim Gring
meischtens isch‘s friedlech am schlafe
mängisch wuchelang
u gäng denn wenn i dänke dass es viellech gar nümm ume sig
schlaft‘s plötzlech nümm
u när faat‘s wieder afa winsle
wie‘nes ganz harmloses Hündli
u chlagt u bättlet i söu‘s für‘nes Viertuschtündli usela
un‘ i weiss ganz genau was das bedütet u bi gliich gäng wieder zweni schlau
u de faat aues grad wie gäng wieder vo vore a
es chliises fieses Monster
es chunnt immer wieder zrügg
lue es louft i mine beschte Schtifu Richtig Bahnhof über d‘Brügg

back to top

hermann

vor mängem Fänschter u vor mänger Türe
han‘i scho gwartet u die schönschte Lieder gsunge
i ha scho mängisch e schöni Frou probiert z‘verfüehre
u bi diesere u äire isch‘s mr glunge
i ha scho mängisch vouer Gluet um öpper gworbe
u ha mr iigredt i chönn ohni nümmeh sii
aber gäng denn wenn i ändlech mau am Zieu bi
de chunnt‘s mr vor aus wär ds Beschte scho vrbii
de dünkt‘s mi d‘Würklechkeit kapier das Schpieu nid
u aues wo so schön het blüeht i mire Fantasie
verweuki scho mit dr erschte Berüehrig
u verflügi wie‘ne süesse Troum im Liecht
wenn i‘s bi dir mit aune Tricks probiere
i gieng für ei einzigi Nacht blindlings dür ds Füür
gloub mr nüt - i bi‘ne hoffnigslos romantische Verlierer
verschänk di - oder verchouf di müglechscht tüür

back to top

toti flüger

dr Kanton Aargou flügt vrbii
u millione toti Flüger chläbe chrüz u quer verquetscht a mire Windschutzschibe
voruss wird‘s langsam Morge
u vor mir am Horizont gseht me em Jurasüdfuess sini grüene Socke rächts am Biudrand
chliini Dörfli i de Hügle
luter Hüsli wit u breit
wie Pfäfferchörner über nes gigantischs Rüehrei gschtröit
uf em Näbesitz schtinkt mi Täsche u dr Äschebächer brönnt
u dr Räschte vo dr Firma hanget i de Gürt u pennet
10 000 Kilometer uf däm länge graue Band
we me wie mir gäng hin u här fahrt git‘s eim fei echli es Dürenand
mir si uf em Heiwäg - i weiss scho wieder nümm vo wo
u irgend so‘ne Heiwehcountryschlager tropfet us em Radio
i ha‘nes fetts Bigeli Nötli i mim Hosesack un i ha‘ne guete Plan
i reserviere mir für hütt Aabe es Tischli
un‘i weiss genau mit wäm
dr Kanton Aargou flügt vrbii
u millione toti Flüger chläbe chrüz u quer verquetscht voruss ar Windschutzschibe
u dr Asphaut brönnt u flimmeret
vor mir am Horizont gseht me em Jurasüdfuess sini grüene Socke rächts am Biudrand

back to top

geburtstag

mine Schtifu fähle d‘Sohle
dür mini Hose wäiht dr Wind
söu mi haut dr Tüfu hole
i schtah vor dir mit lääre Händ
i han‘es fetts Bigeli Nötli gha un‘e todsichere Tip
un‘i weiss gäng no nid genau wieso
s‘het ömu när nid funktioniert
jitz bin‘i wieder chli am schwümme
besser gseit i bi am touche
grad viu bliebe isch mr nümme
i bi pleite wie no nie
jitz won‘i ändlech mau dra dänkt hätt
weisch was i dir hütt aues gschänkt hätt
d‘Schtärne dr Mond u d‘Sunne
i hätt aues gkouft für di
i singe dir es chliises Lied zum Geburtstag
das isch ds Einzige won‘ig jitz no chönnt mache
es het e süessi Melodie
i ha se gklauet für di
u dr Text drzue han‘i säuber ‘bache
jitz won‘ i ändlech mau dra dänkt hätt
weisch was i dir hütt aues gschänkt hätt
weisch wie schwär dass i di behänkt hätt
i hätt abdrückt wie no nie
du - i wär gärn chli dür dä Loeb
un‘i hätt Gäud usegla für di wie blöd
du chasch mr‘s gloube oder nid
i hätt aus usgäh für di
i singe dir es chliises Lied zum Geburtstag
das isch ds Einzige won‘ig jitz no chönnt mache
es het e süessi Melodie
i ha se gklauet für di
u dr Text drzue han‘i säuber ‘bache

back to top

wenn i di nid cha überrede

i hocke a däm Chuchitisch u du packsch dini Sache
du hesch mr gseit du wöusch mi nümmeh gseh
i loufe dir nid nache
aber los mr bitte zue
o we d‘dr no so sicher bisch

wenn i di nid cha überrede - wär de süsch

au die schöne Jahr bin‘i gäng tröi a dire Site gsii
u du bisch immer überzügt
i wöu immer en Angeri aus di
was söu i mache
we du für mi die Eini bisch

wenn i di nid cha überrede - wär de süsch

u we d‘mr jitz mis Härz verbrichsch
u we de hütt zu dere Tür usschliichsch
de warten‘i uf di
bis denn we d‘wieder chunnsch
u denn we d‘wieder chunnsch
de hocken‘i hie a däm Tisch
ganz egau wie lang dass d‘furt gsii bisch
u öb d‘no immer ds Gliiche dänksch wie gäng
i warte hie u überrede di de denn
wie söu i zuegä was i weder gmacht ha no hätt wöue
wie wosch we d‘ mir nid trousch je öpper angerem vertroue
mit au däm dumme Züg wo de dänksch
i ha di gärn eso wie d‘bisch

wenn i di nid cha überrede - wär de süsch

u viellecht gloubsch mr‘s irgendwenn
u viellecht blibt‘s eso wie‘s isch

wenn i di nid cha überrede - wär de süsch

back to top

radio zum glück

us luter Gwohnheit drücken‘i am Morge uf em Wäg uf ds WC
gäng wieder uf ds Chnöpfli vo däm Grät
u das wo jitz passiert isch wie wenn e Trättmine explodiert
i däm Momänt won‘i‘s ghöre isch es z‘schpät

warum sände die hütt wieder nume Scheisse
u warum hocken‘i hie wehrlos uf em Klo
u warum het niemer Erbarme
i ha nid so längi Arme
cha nid ändlech öpper cho
wieso zieht niemer a däm Schtecker vo däm Radio

zum Glück si mini Fänschter zue
es isch e schöne Morge u mini Nachbare si dusse
i wohne scho lang hie un‘i kenne aui guet
u mir wär‘s ziemli piinlech we die würde ghöre was i lose

warum sände die hütt wieder nume Scheisse
u warum hocken‘i hie wehrlos uf em Klo
u warum het niemer Erbarme
i ha nid so längi Arme
cha nid ändlech öpper cho
wieso zieht niemer a däm Schtecker vo däm Radio

back to top

miuch & zucker

i trinke Tee am Morge scho
dä wo sie gärn trinkt un‘i nideso
Miuch u Zucker so wie sie
u scho isch‘s chli wie we sie o umeblättere i dene Frouemagazin
Biudli luege - i eim bin‘i sogar dinn
dusse liegt no Schnee vo geschter liege gäng no ihri Sache ume

e Seife uf em Büechergschteu
es Mandarindli i mim Bett

i ha‘ne Schtreife Biuder i mim Chopf
u das isch aues wo fürig blibt we sie nid ume isch
aues wo fürig blibt we sie nid ume isch Ziit
vieu z‘vieu Ziit

i la dr Fernseh a u zäppen‘echli ume bis mr Zigis usgöh
bis i Hunger überchume
i schtah uf u mache d‘Läde zue
u liege wieder i ds Bett u dänke chli a sie

Pumaschlarpe un‘e Kimono
Chatzefuetter i mim Schüttschtei

i ha ne Schtreife Biuder i mim Chopf
u das isch aues wo fürig blibt we sie nid ume isch
aues wo fürig blibt we sie nid ume isch Ziit
vieu z‘vieu Ziit

back to top

hugetobler

(bss - abede frage?)
wo’s am Hugetobler het d Sicherige verbrate
het er grad ine Zibele bisse
u sis 253igschte Lied komponiert
es ich emne verschiffete Apriutag gsi
u d würm si usem Dräck cho z schlüüfe
u hei Tannhüser gsummet
u är isch düredräit
er het sis Tintefass vom Tisch gfägt
u s Bluet het gäge sini Schläfe ghämmeret
u är het gschroue u umgmööget
u d Huusverwauterin im Parterre het dänkt:
"i ha s ja scho immer gwüsst, das das Arschloch nüme aui Tasse im Schrank het
jetz het er sech auso sini ändgüutig letschti Arie abegwichset
u mit der Mieti woner is no schoudet laht er is la hocke
u eines Tages wird me ne im Räge beärdige
u irgendwenn wirder vilich berüemt sii.
u mi interessiert im Momänt nur, wenn dass er ändlech mit däm verfluechte Gmöög ufhört
dämleche schwule Affenarsch
u we si ne hie äntlech useschaffe
chani nume hoffe das me mer en aschtändige solide Fischer inesetzt
oder e Henker
oder eine o für Dummi traktätli verchlopft
gopfertellisiech"

back to top